ភ្នំពេញ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា បានបញ្ជាក់ប្រាប់ EAC ថា គ.ជ.ប បានទទួលស្គាល់អ្នកសង្កេតការណ៍អន្តរជាតិ និងភ្ញៀវពិសេសសរុបចំនួន ៦០៤នាក់ ដែលមកពីជាង ៤០ស្ថាប័ន ដែលនឹងអញ្ជើញមកសង្កេតការណ៍បោះឆ្នោតនៅកម្ពុជានៅថ្ងៃអាទិត្យនេះ។
ខណៈនៅសល់ ២ថ្ងៃទៀត ថ្ងៃបោះឆ្នោតនឹងឈានមកដល់ អ្នកសង្កេតការណ៍អន្តរជាតិមួយចំនួន ក្នុងនោះក៏មាននាយករដ្ឋមន្ត្រីនៃសាធារណរដ្ឋហ្គីណេប៊ីស្សូបានអញ្ជើញមកដល់កម្ពុជានៅថ្ងៃនេះ ហើយនឹងមានប្រធានសភាប្រទេសម៉ាឡេស៊ីអតីតប្រមុខរដ្ឋប្រមុខរដ្ឋាភិបាល អតីតប្រធាន អនុប្រធានរដ្ឋសភាទាំង ១១រូប ក៏នឹងអញ្ជើញមកកម្ពុជាដោយផ្ទាល់ផងដែរ ព្រមជាមួយនឹងអ្នកសង្កេតការណ៍បរទេសជាច្រើននាក់ទៀតក៏កំពុងតែអញ្ជើញមកដល់ជាបណ្តើរៗ។
សម្តេចតេជោ បានសរសេរសារតាមតេឡេក្រាមនៅថ្ងៃនេះ ដោយបានអរគុណចំពោះលោកប្រធានសភា ប្រទេសម៉ាឡេស៊ី និងនាយករដ្ឋមន្ត្រី នៃសាធារណរដ្ឋហ្គីណេប៊ីស្សូ អតីតប្រមុខរដ្ឋប្រមុខរដ្ឋាភិបាល អតីតប្រធាន អនុប្រធានរដ្ឋសភាទាំង ១១រូបដែលបានចំណាយពេលវេលាធ្វើដំណើរមកកាន់កម្ពុជា។ ព្រមទាំងស្វាគមន៍ដល់ប្រតិភូសង្កេតការណ៍បរទេសចំនួន៣៣៣រូបដែលនឹងមកចូលរួមក្នុងដំណើរការបោះឆ្នោត។
អគ្គនាយកដ្ឋានព័ត៌មាន និងសោតទស្សន៍ នឹងរៀបចំធ្វើសិក្ខាសាលាស្តីពីការចូលរួមសង្កេតការណ៍សម្រាប់អ្នកសង្កេតការណ៍អន្តរជាតិចាប់ពីថ្ងៃទី២១-២២ និងថ្ងៃទី២៤ ខែកក្កដា ឆ្នាំ២០២៣ នៅសណ្ឋាគារសុខា៕